寫咗幾期Blog後，有老友話寫呢啲財經網誌，唔派吓冧巴唔得，要俾幾隻股咁先可以吸引到啲眼球，否則成日發表自以為好正嘅個人偉論，邊有人睇？

吓！乜寫財經網誌要派冧巴，呢樣真係有啲難度，事關有幾多人咁叻，講嗰隻贏個隻，萬一累網友輸錢，輕則被罵爆，重則遺臭萬年。

群眾係善忘

老友話咁就唔係，坊間好多股評人或者專欄作家夠成日貼錯冧巴，咪一樣咁紅，皆因好多小股民鍾意，咪迎合吓佢哋囉。就好似每年啲玄學家出運程書，大家都唔知得唔得，但一樣賣個滿堂紅。（講真，小弟有個朋友以前幫人寫過呢啲書，佢將往年幾本相類書藉夾埋，左炒右炒就得，你話信唔信得過？）

而且群眾係善忘，未必記得你貼嗰隻股，再唔係最煞食一招係好似啲股評人，一年三百六十五日不斷俾冧巴，總有十隻八隻中，技巧係馬後炮，唔好提你講過嗰啲輸嘅股，但就不斷重覆講啲贏錢股，特別係咁好彩撞中隻爆升股，就要日日提：「若果你當初跟我買，咁就賺咗幾多幾多倍喇。」

其實如果心水清，就知佢俾好多冧巴你，大部份都係輸，有啲可能重輸死人。況且，佢撞中嗰隻股你通常冇咁好彩買中，事關一般人口袋啲錢有限，邊可以隻隻跟足。但啲股評人就好似寫馬經咁大包圍，然後贏就打鑼打鼓，輸就側側膊唔出聲。

大家可能會覺得俾我「昆」咗，又話羊年必勝股，結果睇咗咁耐都冇提邊隻股。其實好簡單，發咗咁多盧騒，就係想講，世界邊有必勝股，如果真係有，我都唔會話俾大家聽咁喇。

吼中海油、昆崙能源及中聯重科

不過咁，為咗應應景，小弟都姑且貼吓幾隻股應吓節，但先旨聲名，並唔係必勝。至於我嘅心水，就係石油股。吓！啲油價跌到咁，仲夠膽去博？

其實就因為啲人睇到油價好淡，但我相信油仍然係主要燃料，喺未來十年還是必須，現時因為受地緣政治問題影響而大幅下調，但我相信價格升跌係一個循環，特別外界睇到油價末日時，小弟反而投下信心一票，所以今年我建議買中海油（00883）同昆侖能源（00135）。

另外，都睇好「一帶一路」概念，我會貼隻中聯重科（01157），一來食到概念，二來企業進行重整，三來個價太殘。

不過咁，喺度要聲明，小弟有名你叫金融loser，信幾多就各自決定；總之，贏咗唔使請我飲荼，輸咗更加唔好怨我。

==============

金融loser
炒股廿年，輸多贏少，喺股市交過唔少學費，見過好多所謂股神或金融才俊起起跌跌，最後體會到炒股第一步，係先唔好諗贏而係要諗唔好輸，點樣可以減少輸嘅機會，就係聽多啲別人失敗經歷，引以為戒，規避風險。